Search

வடக்கு தமிழர்களை பொலிஸில் சேர்க்க வேண்டும்! விக்னேஸ்வரன் கூறுவதை ஏற்கப் போவதில்லை!- அஜித் ரோஹண

இலங்கை அரசியலமைப்பின் 13-ம் திருத்தப்படி மாகாணசபைகளுக்கு காவல்துறை அதிகாரங்கள் உள்ளன. ஆனால் அவற்றை மாகாணசபைகளுக்கு வழங்குவதற்கு அரசாங்கம் இன்னும் முன்வரவில்லை.

இந்நிலையில், வடக்கு மாகாணத்தின் முதலாவது முதலமைச்சராக பதவியேற்றுள்ள சி.வி. விக்னேஸ்வரன், வடக்கு பிராந்திய மக்களின் மொழியையும் கலை, கலாசார, வாழ்க்கை முறையையும் புரியாத காவல்துறையினர் தொடர்ந்தும் அங்கு இருப்பது, அங்கு ஜனநாயகம் ஏற்பட தடையாக இருப்பதாக நேற்று முன்தினம் வெள்ளிக்கிழமை கூறியிருந்தார்.

உள்ளூரில் உள்ள இளைஞர்களுக்கு பயிற்சியளித்து காவல்துறையில் சேர்த்துக்கொள்ள நடவடிக்கை எடுக்கப் போவதாகவும் அவர் தெரிவித்திருந்தார்.

வடக்கு மாகாணத்தைச் சேர்ந்த இளைஞர்களை காவல்துறையில் சேர்த்துக்கொள்ள நடவடிக்கை எடுக்கப்பட வேண்டும் என்றும் முதலமைச்சர் தனது உரையில் சுட்டிக்காட்டியிருந்தார்.

அதுகுறித்து பிபிசி தமிழோசையிடம் பதிலளித்த இலங்கை காவல்துறையின் பேச்சாளர் எஸ்எஸ்பி அஜித் ரோஹண, முதலமைச்சர் கூறுவதற்கு முன்னரே காவல்துறை தமிழ் தெரிந்தவர் அதிகாரிகளை வடக்கில் போதுமான அளவுக்கு நியமித்துள்ளதாகக் கூறினார்.

வடக்கு பிராந்தியத்தில் எந்தவொரு பொலிஸ் நிலையத்திலும் தமிழ் மக்கள் முறைப்பாடு செய்ய, தமிழில் குறிப்புகளைப் பெற தமிழில் நீதிமன்ற அறிக்கைகளைப் பெறக்கூடியதாகத்தான் இருக்கிறது’ என்று அஜித் ரோஹண கூறினார்.

அதேபோல, காவல்துறையினருக்கு கொடுக்கப்படுகின்ற பயிற்சிநெறியின் போது பல்லின சமூகங்களின் கலசாரங்கள் பற்றியும் அவற்றுக்கு மதிப்பளிக்கும் முறை பற்றியும் அறிவூட்டலும் வழங்கப்படுகிறது.

முதலமைச்சர் இப்போது சொல்லியுள்ளதை நாங்கள் யுத்தம் முடிய முன்னரே செய்துவிட்டோம். புதிதாக செய்வதற்கு ஒன்றுமில்லை என்றும் இலங்கை காவல்துறை பேச்சாளர் தெரிவித்தார்.

வடக்கு மாகாணத்தில் தமிழர்கள் மட்டும்தான் வாழ்கிறார்கள் என்று கூறமுடியாது. வவுனியா மாவட்டத்தில் சிங்கள மக்கள் இருக்கிறார்கள். மன்னாரில் முஸ்லிம் மக்கள் இருக்கிறார்கள்.

அதேபோல எதிர்காலத்தில் இன்னும் குடியேறவும் மக்கள் எதிர்பார்த்திருக்கிறார்கள். அனுராதபுர எல்லையில் சிங்கள மக்கள் கூடுதலாக வாழ்கிறார்கள்.

வடக்கிலிருந்து உருவான தமிழர்களையே பொலிஸில் சேர்த்துக்கொள்ள வேண்டும் என்பதை நாங்கள் ஏற்றுக்கொள்ளப் போவதில்லை என்றும் இலங்கை காவல்துறை பேச்சாளரான அஜித் ரோஹண கூறினார்.

இதேவேளை, பிரபாகரன் இந்த யுத்தத்தை 1970களில் தொடங்கும் போதும் நிலைமை இப்படித் தான் இருந்தது.

இப்போது தேசிய பாதுகாப்புக்கு அச்சுறுத்தல் இல்லாவிட்டாலும் எப்போது ஏற்படும் என்று சொல்லமுடியாது என்றும் காவல்துறை பேச்சாளர் தெரிவித்தார்.

வடக்கில் தமிழ் பேசும் மக்கள் மட்டுமே வாழவில்லை: பொலிஸ் பேச்சாளர்

இலங்கையின் வடக்கில் தமிழ் பேசும் மக்கள் மட்டுமே வாழவில்லை என பொலிஸ் ஊடகப் பேச்சாளர் பொலிஸ் அத்தியட்சகர் அஜித் ரோஹன தெரிவித்தார்.

அவர் மேலும் தெரிவிக்கையில்,

யுத்தம் முடிவடைந்த பின்னர் பொலிஸ் சேவைக்கு ஆயிரத்து 500 தமிழர்கள் இணைத்து கொள்ளப்பட்டனர். இவர்களில் 8 பேர் உப பொலிஸ் பரிசோதகர்கள்.

பொலிஸ் சேவையில் உள்ள மொத்த பொலிஸாரில் இரண்டாயிரத்து 800 தமிழ் பொலிஸார் சேவையாற்றுகின்றனர். இவர்களில் 900 பேர் வடக்கு மாகாணத்தில் பணியாற்றுகின்றனர்.

வடக்கு மாகாண சபையின் கன்னியமர்வில் தனது கொள்கையை விளக்கி உரையாற்றிய முதலமைச்சர் சி.வி. விக்னேஸ்வரன், வடக்கு மாகாணத்தில் தமிழ் மக்களின் கலசாரத்தை அறிந்த தமிழ் பேசும் பொலிஸ் அதிகாரிகள் இணைத்து கொள்ளப்பட வேண்டும் என்று தெரிவித்திருந்தார்.

இதன் மூலம் தமிழ் மக்களுக்கு அதிகளவில் சேவையாற்ற முடியும் என்றும் அவர் கூறியிருந்தார்.

இதற்கு பதிலளித்த பொலிஸ் ஊடகப் பேச்சாளர், ஏற்கனவே வடபகுதி மக்கள் தமிழில் முறைப்பாடுகளை செய்யவும், அதன் பிரதிகளை பெற்றுக்கொள்ளவும், நீதிமன்ற அறிக்கையை பெற்றுக்கொள்ளவும் பொலிஸாருடன் தமிழில் உரையாடவும் சந்தர்ப்பம் ஏற்படுத்தி கொடுக்கப்பட்டுள்ளது.

பொலிஸ் பயிற்சி நெறியில் பல்லின சமூகத்தில் சேவையாற்றும் அதிகாரிகளின் செயற்பாடுகள் எப்படி அமைந்திருக்க வேண்டும் என்ற பாடநெறி உள்ளடக்கப்பட்டுள்ளது. பல்லின சமய கலாசாரங்களை மதிக்க வேண்டிய விதம் பற்றியும் அவர்களுக்கு கற்பிக்கப்படுகிறது.

வடக்கில் தமிழ் மக்கள் மட்டுமே வாழ்வதாக பொலிஸார் கருதவில்லை. வவுனியாவில் தமிழ், சிங்கள மற்றும் முஸ்லிம்கள் என மூவின மக்களும் வாழ்கின்றனர். மன்னாரில் தமிழ் மற்றும் முஸ்லிம் மக்கள் வாழ்கின்றனர்.

உலகில் எங்கும் அதிகமாக வாழும் இனத்தை சேர்ந்தவர்களை பொலிஸ் அதிகாரிகளாக இணைத்து கொள்வதில்லை. போட்டி பரீ்ட்சையில் அல்லது நேர்முகப் பரீட்சைகளில் அதிக புள்ளிகளை பெறுபவர்களே பொலிஸ் சேவைக்கு தெரிவு செய்யப்படுகின்றனர் என்றார்.




Leave a Reply

Your email address will not be published.